సగం - సగం (కవిత )

సగం సగం☘
..........................✍ తంగెళ్ళ శ్రీదేవి రెడ్డి

ఆకాశంలో సగం....అవనిలో సగం....
నీవు చినుకువై రాలినప్పుడు
నేను తడుపునై పులకరిస్తుంటాను 

మనసులో సగం...మనువులో సగం....
నీవు వెలుగువై ప్రసరించినప్పుడు
నేను కిరణమై ప్రజ్వరిల్లుతుంటాను ☺

గాయంలో సగం...కాయంలో సగం....
నీవు చీకటివై చిన్నబోయినప్పుడు
నేను మబ్బునై తోడుగా నిలుస్తుంటాను 

పోరాటంలో సగం...ఆరాటంలో సగం....
నీవు గమ్యానికై సాగుతున్నప్పుడు
నేను నీడనై కదులుతుంటాను ‍⚕️

బతుకులో సగం...బాధలో సగం...
నీవు సముద్రుడివై పొంగినప్పుడు
నేను నదీ నాదమై పెనవేసుకుంటాను ☺

ఆశలో సగం...ఘోషలో సగం....
నీవు దారివై సాగినప్పుడు
నేను నడకనై వెంబడిస్తాను 

మాటలో సగం...పాటలో సగం...
నీవు యుగళానివై గళం విప్పినప్పుడు
నేను బాణీనై స్వరాలు సమకూరుస్తుంటాను 

ప్రకృతిలో సగం...ఆకృతిలో సగం...
నీవు పున్నమివై పులకించినప్పుడు
నేను ధవళమై జాలువారుతుంటాను. 欄

వర్తింపులో సగం...గుర్తింపులో సగం...
నీవు దిశగా నిర్దేశమైనప్పుడు
నేను దశగా నిర్ణయమౌతుంటాను ✌

భరణంలో సగం...మరణంలో సగం....
నీవు క్షిపణివై కూలినప్పుడు
నేను శకలమై కాలుతుంటాను

పయనం లో సగం...ప్రాణంలో సగం...
నీవు సుమమై రేకులు విప్పుకున్నప్పుడు
నేను పరిమళమై వ్యాపిస్తుంటాను 

రాసిలో సగం ....వాసిలో సగం...
రాతవై నీవు దొర్లినప్పుడు
గీతనై నేను తరిస్తుంటాను ✏

ప్రణయంలో సగం.... ప్రళయంలో సగం...
నీవు విఫలమైన శాంతివైనప్పుడు
నేను సఫలం కోసం యుద్ధమౌతుంటాను鷺

అవును!
నువ్వు అతిథివి నేను ఆతిథ్యాన్ని....
నువ్వు మేఘానివి నేను గర్జనని...⛈⛅
నువ్వు హృదయానివి నేను ఆ స్పందనని....
卵✊