ఆమె గొంతుక (కవిత )

ఆమె గొంతుకనై....
.........................
రచన: డా.తంగెళ్ల శ్రీదేవి రెడ్డి
*బంగారు పంజరంలో చిక్కుకున్న
ఉక్కు పిడికిలిని
ఆంక్షల కవచాలు ధరించిన
అక్షర లక్షణాన్ని
నేను
మానవిని....మానవీయతని....
అరణ్యాన్ని మింగుతున్న అతిసుకుమారిని
అగ్ని కీలల్లో కాలుతున్న మంచుశిఖరాన్ని
నేను
బాంధవిని....బాంధవ్యాన్ని...
బానిస సంకెళ్ళు ధరించిన పరాక్రమాన్ని
అణిచివేతను
సహిస్తున్న అద్భుతాన్ని
నేను
సవ్యసాచిని.....సాధికారతని....
ప్రపంచాన్ని నడిపించగల  ప్రతిభాశాలిని
పరాయికరణలో  ఓడుతున్న పాపక్రీడని
నేను
నవీనని.....నవ్యతని....
శిథిలాల్ని కావలించుకున్న సుందరస్వప్నాన్ని
గ్రీష్మాని మోస్తున్న  వ'సంతకాన్ని'
నేను
ఆకాశాన్ని....అనితరసాధ్యాన్ని...
అవును
నేను
వెన్నెల వాకిలిని.....
ఆదరణ కరువైన పొక్కిలిని.....
నిజంగా మిక్కిలిని........