ఇదీ వరుస (కవిత )

ఇదీ వరస...
.........................

                  ✍  తంగెళ్ళ శ్రీదేవిరెడ్డి樂

గుడి ముందు అడుక్కుతింటున్న
నా అవ్వను దాటుకుంటూ
గుడిలో నా సాములోరి కోసం
ప్రతి రోజూ పైసల సంచులు పరుగెడుతుంటయి.. ..

బడిలో గోడ కుర్చీ ఏయించిన
పీజులు కట్టని  నా బుడ్డోడిని దాటుకుంటూ
అంబాసిడర్ పేరుమీద మన సానియమ్మకు
చేరిన కోట్లకట్టలు.... యాది మరువని సోపతై
నిత్యం సతాయిస్తుంటయి...

తలుపుల్లేక పరదాలు కట్టుకున్న
బాలికల వసతి గృహాల మరుగుదొడ్లను దాటుకుంటూ
ఇవాంకా'లాంటోళ్ళ కోసం ఇకిలించుకుంటూ పోతున్న
ఖజానా కాఠిన్యం ...పీడకలై వెంటాడుతుంటది..

కనికరంలేని కాలన్ని కన్నీటితో భరిస్తున్న
నా రైతన్నల   అవస్థల్ని దాటుకుంటూ
కమర్షియల్ కాసుల మూటలు
కాంస్యం సాధించినోళ్ళ ఇంటిముందు సాగిలబడిన తీరు
సుఖమెరుగని సుస్తీలా ఇంకా సతాయిస్తూనే వుంది..☹

పోరగాళ్ళ పాలడబ్బాలకు పైసలు కరువై
ఏటీఎం ల చుట్టు  ప్రదక్షిణలు చేస్తున్న
నా సోదరుడి అసహాయతను  దాటుకుంటూ
విజయ్ మాల్య
లలిత్ మోడి
నీరవత్ మోడిల కంటైనర్లు వెళ్తుంటే
భావిభారతం కోసం వరదలవుతున్న ఉపన్యాసాలు
చెవులెంబడి రక్తం కారిస్తున్నయి..
***
ఇప్పుడు మనకు మనమే ఒక ప్రశ్న...!!!?????????????????