నాన్న (కవిత )

నాన్న.....
----------------------
               ✍ తంగెళ్ళ శ్రీదేవిరెడ్డి

బంధాల కవచం ధరిస్తాడు
బాధ్యతల బరువులు మోస్తాడు
తనెప్పుడూ బయటే వుంటాడు
మనసును మాత్రం ఇంట్లోనే
వదిలి పెడ్తాడు......

కష్టం నష్టం భరిస్తాడు
సాంతం ఇంటికై శ్రమిస్తాడు
తనెప్పుడూ ఖర్చు చేస్తాడు
ఆ జాబితాలో తన పేరును మాత్రం
విస్మరిస్తాడు.....

సరిహద్దులు గీస్తాడు
ఆంక్షలు విధిస్తాడు
తనెప్పుడూ భయపెడ్తాడు
ఆ వెనకాలే నిలిచిన  'బలహీనతని '
బలవంతగా అదిమి పెడ్తాడు.....

తోటమాలై కాపలా కాస్తాడు
మార్గదర్శై దారి చూపుతాడు
తనదెప్పుడూ యుద్ధప్రకటనే
తన గెలుపుకై కాదు
మన  గెలుపును స్వీకరించుటకై.......