నల్లమల విలవిల

https://youtu.be/AslMjpCsU-s

జై జవాన్ తుముకో సలాం

రచన ;తంగెళ్ళ శ్రీదేవిరెడ్డి
సంగీతం ;S.A.ఖుద్దూస్ భయ్యా
😢అమరులైన పుల్వామా భారతవీరుల కన్నీటి స్మృతిలో.... 😢
🇮🇳🌷జై జవాన్ తుముకో సలాం
   ఏ తల్లి నిన్ను గన్నదో
   ఏ తండ్రి నిన్ను పెంచెనో
   ఏ ఊరు నీది? ఏ ఇల్లు నీది??
   ఈ రోజు నీపేరు అమరమయ్యింది...
   దేశానికై నీ జన్మ త్యాగమయ్యింది....
🇮🇳🌷భార్య పిల్లల వొదిలి వెళ్ళావు
      మళ్ళీ వస్తానని మాట ఇచ్చావు
      అయ్యో సైనికుడా......😢
      ఉగ్రదాడిలో కనుమూసినావా !?
      జాతి జెండవై అవనతమైనవా |
      జై జవాన్ తుముకో సలాం 🇮🇳
🇮🇳🌷ఎండనక వాననకా
       రేయనక పగలనక    
       సరిహద్దు పొడవునా కాపలై నిలిచావు    
       మా రక్షణ కవచమై తిరిగావు....
       అయ్యో సైనికుడా....😢
       రక్కసి మూకలు తెగబడినాయా  
       నెత్తుటి చినుకై నేలరాలినావా??
🇮🇳🌷కన్నవారి కడుపు శోకం
       దేశ భక్తుల అశ్రు నయనం
       క్షణం క్షణం ప్రాణభయం
       అయినా చెదరని నీ ధైర్యం...
       అయ్యో సైనికుడా... 😢
       వీరమరణమై వెళ్లిపోయావా
       మా అడుగుజాడవై మిగిలిపోయావా !?
🇮🇳🌷నీవులేనిదే దేశం లేదు
      దేశాన్ని మించిన స్వర్గం లేదు...
      కర్మభూమిలో ధర్మం నీవే
      ధర్మనీతిలో పుణ్యం నీవే....
      శిరస్సు వంచి నిలుచున్నాం....
      అశ్రు ఒక్కటి అర్పిస్తున్నాం 💧
      జై జవాన్...🇮🇳
      జయహో జవాన్... 🇮🇳     

బతుకమ్మ పాట

బతుకమ్మ పాట
°°°°°°°°°°°°°రచన ;తంగెళ్ళ శ్రీదేవిరెడ్డి
(పల్లవి, చరణలతో కూడిన పాటను, పాడుకోవడానికి అనుగుణంగా మార్పు చేసాను )

🌾తూరుపు కొండల్లో-- చందామామా...
    తెల్లారకుండానే--  చందామామా...
    తట్ట బుట్ట  పట్టి -- చందామామా
    తంగేడు కోసం --చందామామా..
    తరలిన పోరగాళ్ళు --చందామామా...

 🌻 పసుపు రంగుల్లో-- చందామామా...
     పూసిన అడవి  -- చందామామా...
     పూవుల్ల సొగసుకు  -- చందామామా..
     పులకించే పుడమి -- చందామామా..
     పురివిప్పే మనసు -- చందామామా...

 🌼 కాసిన గునుగులు-- చందామామా...
      కనువిందు జేయ --చందామామా..
      కదిలొచ్చే ఇంటికి  --చందామామా...
      కలుపులు కాదు -- చందామామా...
      కలిమి గురుతులు -- సందమామా...

   👏 సందడి ఊరంతా  -- చందామామా..
      సప్పట్ల తాళాలు  -- చందామామా...
      సాగిన పాటలు --  చందామామా...
     సరిలేని రాగాలు -- చందామామా...
     సక్కని  సంస్కృతి  -- చందామామ...

 🌱 తొమ్మిది రోజులు --  చందామామా
      తీరొక్క పేరు  --చందామామా...
      తీరుగా తలిచి --చందా మామా...
      త్రికోణ రూపం -- చందా మామా...
      తల్లీ నిను కొలిచి  -- చందా మామా...

🌿 ఆడపడుచులు --చందామామా..
     అందరూ గూడి -- చందమామా....
     ఆడిపాడగా  -- చందామామా..
     అమ్మ నీ కరుణ -- చందామామా...
     అందిన వరమయే  -- చందా మామా...

🍁  బొడ్డెమ్మ లాడంగా  -- చందామామా...
       బతుకమ్మ మెచ్చింది  -- చందమామా...
       బంగారు  గౌరమ్మ  -- చందమామా....
       బతుకులు  పండంగా  -- చందా మామా....
       బంధాలు నిలువంగా  -- చందమామా....

🍂  సద్దులు మోయంగా -- చందామామా...
       సింగిడి కొలువాయే -- చందామామా...
       సోపతి  వొదలం -- చందామామా...
       సాలు సాలుకు  -- చందామామా...
       సాదుకో తల్లీ  -- చందామామా...

🌺   పారేటి నీళ్లల్లో  -- చందమామా....
       పోయిరా తల్లీ -- చందామామా...
       పవిత్ర మూర్తివి -- చందా మామా
       పాడి పంటలు -- చందమామా...
       పిల్లా పాపలు -- చందమామా...
       పది కాలాలు  --  చందమామా.....
       పదిలంగా ఉండాలి -- చందమామా...2

పాట

✍🏿తంగెళ్ళశ్రీదేవిరెడ్డి

పల్లవి: కరీం నగరు ముద్దుబిడ్డ

        క్రమశిక్షణ వీడి అడ్డ

        చిరునవ్వే ఆయుధమై

        సమరానికి సాయుధమై

        ప్రత్యర్థికి ముచ్చెమటై

        గర్జించిన పులిబిడ్డై

 అన్నొస్తున్నాడదిగో ఆపద్భాంధవుడై....

    కోరస్:    నిస్వార్థుడు చరితార్థుడు

      ప్రభకరన్న  మన ఆప్తుడు

      కాంగ్రేసుకు తోడయ్యే

     మనకేమో నీడయ్యే......

     జనం జనం ప్రభంజనం

     నిజం నిజం  ఇదినిజం

      దళం దళం జన దళం

చరణం 1: చీకటి బతుకుల్లో వేకువ వెలుగులకై

పేదల గుండెల్లో ఆశలు నింపుటకై.....

జనగళమే తన బలమై

జనహితమే తన మతమై.....

ప్రభవించిన సంభవమై

ప్రజా సంకల్పమై....

అన్నొస్తున్నాడదిగో ఆపద్భాంధవుడై...

  కోరస్: త్యాగధనుడు కార్యఘనుడు

               ప్రభాకరన్న మన మిత్రుఢు

          రాహుల్ కు కుడిభుజమై

         మనకేమో    ఒడివిధమై....

    జనం జనం ప్రభంజనం

        నిజం నిజం  ఇదినిజం

      దళం దళం జన దళం

చరణం 2: తెలంగాణ  రాష్టాన మన జెండా ఎగురుటకై

        సోనియమ్మ  నజరాన అందరికీ చేరుటకై.....

       అవినీతిని కడిగేస్తూ

       అడుగుల్లో అడుగేస్తూ.....

         మంచికొరకు  స్వరమెత్తి

          చీడలపై  శివమెత్తి....

     అన్నొస్తున్నాడదిగో ఆపద్భాంధవుడై

      కోరస్:    ప్రియతముడు ఉత్తముడు

         ప్రభాకరన్న  మన జనుడు

             హస్తానికి     జై కొట్టే

          మనకేమో  సై  చెప్పే

         జనం జనం ప్రభంజనం

        నిజం నిజం  ఇదినిజం

      దళం దళం జన దళం

చరణం 3:రాక్షసపాలనలో రుధిరం  ఆపుటకై

కీచకపర్వంలో కుట్రలు తొలగుటకై....

విలువలను పాటిస్తూ

చేయూతను అందిస్తూ....

రాష్ట్రానికి రక్షకుడై

జగమంతా సైనికుడై...

అన్నొస్తున్నాడదిగో ఆపద్భాంధవుడై...

కోరస్: విరిగుత్తి పిడికత్తి 

ప్రభాకరన్న మన కీర్తి

పార్టికి విలువిచ్చి

మనకేమో బతుకిచ్చి.......

జనం జనం ప్రభంజనం

        నిజం నిజం  ఇదినిజం

      దళం దళం జన దళం

చరణం4:ఎండిన భూముల్లో మొలకల

 ఊసులకై

అలసిన మనసుల్లో ఆసర నింపుటకై....

ప్రతి ఊరు తనదంటూ

ప్రతి ఇల్లూ తానంటూ....

కదిలొచ్చిన జనరథమై

నిలువెత్తూ జనపథమై....

అన్నొస్తున్నాడదిగో ఆపద్భాంధవుడై

కోరస్:రవితేజం రణశౌర్యం

   ప్రభాకరన్న మన ధైర్యం

     తెలంగాణ సారథియై

మనకేమో వారధియై.....

జనం జనం ప్రభంజనం

        నిజం నిజం  ఇదినిజం

      దళం దళం జన దళం..

బతుకమ్మ పాట

రచన :తంగెళ్ళ శ్రీదేవిరెడ్డి
*ఆశ్వయుజ మాసం ఉయ్యాలో...
పచ్చని  ప్రకృతి  ఉయ్యాలో...
*పువ్వులు కాయలు  ఉయ్యాలో..
పులకింత నవ్వులు ఉయ్యాలో...
*సూర్య చంద్రులు ఉయ్యాలో...
సంచారం  జెయ్యంగా ఉయ్యాలో...
*బతుకమ్మ బతుకమ్మ ఉయ్యాలో...
అందాల బతుకమ్మ ఉయ్యాలో....
*ఇంటింటి కొచ్చింది   ఉయ్యాలో....
ఇలవేల్పు అయ్యింది ఉయ్యాలో...
*ఐక్యమత్యము ఉయ్యాలో...
అందరికి పంచింది ఉయ్యాలో..
🌻పెత్తరమాస ఉయ్యాలో...
పెద్దకూతురు ఉయ్యాలో..
*ఎంగిలి పూల బతుకమ్మ ఉయ్యాలో...
అరుదెంచినాదమ్మ ఉయ్యాలో...
*నువ్వులు నూకలు ఉయ్యాలో...
బెల్లం బియ్యం ఉయ్యాలో...
*ఆడబిడ్డలు  అందరు ఉయ్యాలో...
నైవెద్యం పెట్టంగా ఉయ్యాలో.....
* దిక్కుల్లో కొలువై ఉయ్యాలో
దీవించు తల్లీ ఉయ్యాలో
🌻 పాడ్యమి నాడు ఉయ్యాలో...
రెండో కూతురు ఉయ్యాలో...
*అటుకుల బతుకమ్మ ఉయ్యాలో...
అలికిడి జేసింది  ఉయ్యాలో...
*సప్పిడి పప్పు ఉయ్యాలో..
బెల్లం అటుకులు ఉయ్యాలో...
*ఊరంత కలిసి  ఉయ్యాలో...
ఉమ్మడిగా పెట్టిరి ఉయ్యాలో...
*మంచిని నిలుపమ్మా  ఉయ్యాలో
మనిషిని కాపాడ ఉయ్యాలో...
🌻 విదియ రోజున ఉయ్యాలో...
మూడో కూతురు ఉయ్యాలో...
*ముద్దపప్పు బతుకమ్మ ఉయ్యాలో
మురిసి ఆడింది ఉయ్యాలో...
*పాలు బెల్లం ఉయ్యాలో...
పరమాన్నం వండి ఉయ్యాలో...
*వెండి గిన్నెల్లో ఉయ్యాలో...
వేడుక జేసిరి ఉయ్యాల్లో...
*లోక కళ్యాణం ఉయ్యాలో...
నీ పాద ముద్రలు ఉయ్యాలో...
🌻తదియ దినమున ఉయ్యాలో...
నాలుగో కూతురు ఉయ్యాలో...
*నానే బియ్యం బతుకమ్మ ఉయ్యాలో...
నట్టింట నిలిచింది  ఉయ్యాలో....
*బియ్యం నానేసి ఉయ్యాలో...
పాలు పంచదార ఉయ్యాలో...
*పిల్లలు పెద్దలు ఉయ్యాలో...
ప్రేమగా పెట్టిరి ఉయ్యాలో...
*పగలు పంతాలు ఉయ్యాలో...
తొలగించు నా తల్లీ ఉయ్యాలో...
🌻  చక్కని చవితి ఉయ్యాలో...
ఐదో కూతురు ఉయ్యాలో...
*అట్ల బతుకమ్మ ఉయ్యాలో..
అబ్బుర పరిచింది ఉయ్యాలో...
*దోశలు వెయ్యంగా ఉయ్యాలో...
దోస్తీ పెరిగింది  ఉయ్యాలో....
*నిండు మనసులు ఉయ్యాలో...
నిన్ను జేరంగా ఉయ్యాలో...
*దోషాలు తొలగించి ఉయ్యాలో...
దేశాన్ని కాపాడు ఉయ్యాలో....
🌻పంచమి పంచన ఉయ్యాలో...
 ఆరో కూతురు ఉయ్యాలో...
*అలిగిన బతుకమ్మ ఉయ్యాలో...
 చప్పుడు లేదమ్మా ఉయ్యాలో...
* పూలన్నీ చినబోయి ఉయ్యాలో...
ఊరంతా మూగబోయి ఉయ్యాలో...
*తంగేడు వనమంతా ఉయ్యాలో
తల్లీ నిన్ను తలవంగా ఉయ్యాలో...
*గునుగు తోటలు ఉయ్యాలో...
అమ్మా నీ కొరకు ఉయ్యాలో...
* స్వచ్చంగా వేచింది ఉయ్యాలో...
చల్లంగా రావమ్మ ఉయ్యాలో....
🌻 షష్ఠి తిథి ఉయ్యాలో...
ఏడో కూతురు ఉయ్యాలో...
*వేపకాయల బతుకమ్మ ఉయ్యాలో...
వెలుగులు తెచ్చింది ఉయ్యాలో...
*బియ్యం గోధుమలు ఉయ్యాలో...
 చక్కెర కుడుములు ఉయ్యాలో...
*ఆడపిల్లలు  ఉయ్యాలో...
అందించి మొక్కిరి ఉయ్యాలో....
*మమతానురాగాలు ఉయ్యాలో...
వరమివ్వు తల్లీ ఉయ్యాలో....
🌻 సప్తమి సందిట ఉయ్యాలో...
ఎనిమిదో కూతురు ఉయ్యాలో
*వెన్నముద్దల బతుకమ్మ ఉయ్యాలో...
వెచ్చని ఒడి పంచి ఉయ్యాలో...
*వెన్న నెయ్యి ఉయ్యాలో...
మీగడ నురగలు ఉయ్యాలో...
* కలిసి మెలిసి ఉయ్యాలో...
కడవల్లో దెచ్చిరి ఉయ్యాలో...
*కలిమిని నిలిపి ఉయ్యాలో...
లేమిని మాపమ్మ ఉయ్యాలో....
🌻అష్టమి పొద్దున ఉయ్యాలో...
తొమ్మిదో కూతురు ఉయ్యాలో....
*సద్దుల బతుకమ్మ ఉయ్యాలో...
 సందడి జేసింది  ఉయ్యాలో....
*కొబ్బరి తురుము ఉయ్యాలో...
కోరికలు తీరంగా ఉయ్యాలో...
*నూగుల అన్నం ఉయ్యాలో...
నచ్చిన పెనిమిటి ఉయ్యాలో...
*చింత పండు ఉయ్యాలో....
చింతలు దీరంగా ఉయ్యాలో...
*కలగూరలు అన్నీ ఉయ్యాలో...
 కోపాలు కరుగంగా  ఉయ్యాలో
*పులగం బువ్వ ఉయ్యాలో...
రొట్టెల మాలీజ ఉయ్యాలో....
అన్నదమ్ములు ఉయ్యాలో...
అక్కజెల్లెళ్ళు ఉయ్యాలో...
కలిసి మెలిసి ఉయ్యాలో...
కలకాలం ఉండాలి ఉయ్యాలో...
🌻యాడాది కోసారి ఉయ్యాలో...
తొమ్మిది రోజులు ఉయ్యాలో...
*తీరుగా కొలువై ఉయ్యాలో...
తీరొక్క పూల ఉయ్యాలో...
* సంస్కృతి నీవు ఉయ్యాలో...
ప్రాచీన కథవు ఉయ్యాలో....
* తెలంగాణ తల్లీ ఉయ్యాలో...
అందరి దానివి ఉయ్యాలో...
*పారేటి నీళ్లల్ల ఉయ్యాలో...
పోయిరావమ్మ ఉయ్యాలో...
*పూల నెనరు ఉయ్యాలో...... .
దండాలు మా తల్లీ ఉయ్యాలో...
దయగల మాతల్లి ఉయ్యాలో...